ជាការពិតរាល់ដង្វាយដែលយើងបានរៀបចំសម្រាប់ធ្វើពិធីថ្វាយបង្គំឬគោរពទេវតា ទាំងអស់នោះសុទ្ធតែមានអត្ថន័យ សូម្បីតែប្រភេទផ្លែឈើនីមួយៗក៏ត្រូវបានជ្រើសរើសឲ្យត្រូវក្បួន ទៅតាមជំនឿ។
តាមក្បួនហុងស៊ុយបានដំណាលមកថា ផ្លែឈើ ៥ ប្រភេទនេះអ្នកគួរមាននៅលើអាសនៈ រៀងរាល់ថ្ងៃសីលមិនថាខែណាៗក៏ដោយ ព្រោះតាមជំនឿ នោះនឹងនាំឲ្យអ្នកជួបសំណាង សុភមង្គលដល់ក្រុមគ្រួសារពេញមួយខែ៖
៥) ផ្លែចេក
ស្និតនៃផ្លែចេក គឺតំណាងឲ្យប្រអប់ព្រះហស្តរបស់ព្រះពុទ្ធ ហេតុនេះហើយមនុស្សជាច្រើនមានទម្លាប់សែនចេកនៅលើអាសនៈ ហើយដុតធូបគោរពបូជាថ្វាយដល់ព្រះ។ ចេកងាយស្រួលរក តម្លៃក៏មិនថ្លៃនោះដែរ ហើយបើបានចេកចម្ការ ចេកដាំលើដីខ្លួនឯងទៀត គឺកាន់តែប្រសើរ។
៤) ផ្លែក្រូច
ផ្លែក្រូចតាមជំនឿ គឺរមែងនាំភាពជោគជ័យនិងសំណាងចូលដល់ក្រុមគ្រួសារ ហើយពណ៌នៃផ្លែក្រូច គឺសក្ដិសមបំផុតគួរតែមាននៅលើអាសនៈដែលជាកន្លែងគោរពបូជា។
ផ្លែក្រូច ក្នុងអត្ថន័យហុងស៊ុយចិន គឺប្រៀបដូចជាមាស ជឿថា អាចនាំលាភនាំជ័យ ទ្រព្យសម្បត្តិដូចមហាសេដ្ឋីចូលមកក្នុងផ្ទះ។
៣) ផ្លែក្រូចថ្លុង
នៅក្នុងក្បួនហុងស៊ុយចិន ផ្លែក្រូចថ្លុង គេតំណាងឲ្យ កូនប្រុស ហេតុនេះហើយជារឿយៗគេសែនក្រូចថ្លុង ដើម្បីសុំពរជ័យដល់កូនៗរបស់ពួកគេ។ ម្យ៉ាងវិញទៀតក្រូចថ្លុងក៏មានរូបរាងមូលស្អាត ហើយផ្តល់នូវក្លិនក្រអូប ដែលគួរតែមាននៅលើទីតាំងអាសនៈ។
គួរឲ្យដឹងដែរថា ពេលរៀបចំសែនផ្លែក្រូចថ្លុង គឺត្រូវសែនទាំងផ្លែ មិនចាំបាច់បកសំបកអ្វីនោះទេ ពោលឲ្យនៅទាំងទង ទាំងស្លឹក ជាការរៀបចំដ៏ត្រឹមត្រូវបំផុត។
២) ផ្លែប៉ោម
ផ្លែប៉ោមតាមក្បួនហុងស៊ុយតំណាងឲ្យសន្តិភាព និងភាពសុខដុម។ ផ្លែឈើនេះមានគេពេញនិយមយកមកដាក់សែនណាស់ ព្រោះពណ៌ក្រហម ក៏វាតំណាងឲ្យ សំណាងល្អ។
តាមពិតទៅឲ្យតែប៉ោមគឺល្អដូចគ្នា មិនថាក្រហមឬបៃតងទេ តែបើស៊ីជម្រៅឲ្យត្រូវតាមក្បួន ប៉ោមពណ៌ក្រហម តំណាងនូវភាពរុងរឿងសម្បូរបែប រីឯប៉ោមពណ៌បៃតង តំណាងឲ្យលុយកាក់។
១) ផ្លែម្នាស់
ក្បូនហុងស៊ុយនៅប្រទេសចិន ការសែនផ្លែម្នាស់ ដូចជាកំពុងហៅសំណាងមកផ្លូវជីវិតរបស់អ្នក។ ជាងនេះវាក៏ជាផ្លែឈើម្យ៉ាង ដែលគេតំណាងឲ្យលាភនិងទ្រព្យ។ អ្នកគួរតែមានវានៅលើអាសនៈ នៅថ្ងៃសីល ឬថ្ងៃព្រះចន្ទពេញវង់៕
ប្រភព៖ បរទេស | ប្រែសម្រួល៖ ក្នុងស្រុក